بحبك ماما

ما بعرف من وين بدي بلش... 

ولا شو اكتب...

مع اني كنت بأكترية الأوقات ايد ماما اليمين، وخصوصي بالمطبخ، وكانت تحملني مسؤوليات وتطلب مني ساعدها بكتير أشيا، بس على الرغم من كل هالأشيا، ما حسيت ولا مرة انو الأمومة شي هالقد صعب يا ماما... 

بالمختصر، الأمومة هيي أكبر مسؤولية ممكن الوحدة تتحملها بحياتها. من أول ما تعرف انها حامل (أو حتى قبل كمان)، لكل حياتها، وما في تراجع بهالقرار... 

كرمال هيك ما عارفة شو بدي قلك يا مام... او من وين بدي اتذكر... 

من لما كنا زغار وتنزلينا عالحمرا تشتريلنا قصص؟
او من لما كنا نركب كل الpuzzles انا وياكي وحمود؟؟

او من لما كنتي تلبسينا كل العيد احلى تياب وتساويلنا شعراتنا وتصورينا؟ 

او من لما ننام وانتي بالمطبخ وعم تطبخي بالليل لتاني يوم؟

او من لما تفيقي الساعة 6 عالأوتوكار، وتشتري بالشتوية بوط سميك حتى ما يوجعوكي اجريكي من الصقعة من الروماتزم؟

من لما تدرسينا وتسمعيلنا وتساعدينا بالmath لانك بتحبيه وشاطرة فيه؟ 

من لما تجربي تخيطيلنا تياب ونحبن؟

من لما نضهر ننشر غسيل انا وياكي بالليل لنخلص اسرع؟

من لما نتمشى عاتوستراد قريطم لنهضم ونشرب 7up؟

من لما نفيق بكير مع بيبو ببوارج ونشرب قهوتنا؟

من لما تركبي موتير المي لسحب مي بالجبل؟

من لما تاخدينا عند مس مهى عالشبانية؟

من لما تطلعيني كل جمعة ع زحلة عند دكتور التقويم؟ 

او لما تنطريني بعمليات نابي وضراسي؟

من لما تقشريلي تفاحة كتير رقيقة لاعرف اكلها من ورا التقريم؟ 

او تلفيلي سندويش بيكون كتير رفيعة؟

لما تاخديني لاعمل فحوصات دم كل سنة من ورا رفعي؟

وتضلي ورايي لاخد الحديد؟ 

من خوفك عليي فوت ع كلية العلوم؟ 

وفرحك لما انقبلت بالهندسة مع محمد؟ 

وتلفوناتك لما يطلع انفجار واتاخر؟ 

من البرنامج اللي كنت علقلك ياه كل فصل بالجامعة لتطمني اي ساعة رح ارجع؟ 

من تلاميذي لما اتاخر عندن وتجي تجيبيني انتي وداد او تنطروني عند عمتو ندى؟

من التوصيل عالباص عالصنايع كل يوم عال7؟

من لما ارجع من الجامعة وتسخنيلي احسن ما احرد واكل الاكل بارد؟

من التياب اللي بتستحليلي ياهن؟ وهلق لاولادي كمان؟

اذا بضل اكتب ما بخلص... بس قريب يفيقوا كمال وكريم هلق ف رح وقف هون!!

نسيت قول كمان اني فيقتك 2 بالليل نزلتيني عالمستشفى انا وعم ولد...

ما فيي قول شي اكتر من انو الله يخليلنا ياك ويعطيك الصحة والعافية والقوة يا احلى ماما وتيتا مي، ويقدرني كون ام صالحة متلك وربي ولادي متل ما اتربينا انا واخواتي... 

بحبك ماما!!!