بمناسبة يوم المرأة العالمي، اجت ببالي هالخاطرة وحبيت دونها بما انو ولادي نايمين...
ما بعرف ليش كل الناس فجأة قلبوها صراع بين الرجل والمرأة، وكل واحد بده يثبت للتاني انو نحن اهم منكم...
انا بحب قول انو الرجل رجل، والمرأة امرأة...
وما بتكمل الحياة بجنس واحد... وكل واحد منن بكمل التاني
وكل واحد اله اهميته ودوره بالمجتمع...
هلق مين بضحي اكتر؟ هيدا موضوع مختلف... وبكل بيت وبكل عيلة في حدا عم يضحي اكتر من التاني (واوقات تنيناتن بكونوا عم يضحوا بنفس الدرجة)، واكيد برضاه وهو ومبسوط، لان الانسان لما يضحي ويلاقي نتيجة تضحياته اكيد بينسى تعبه، خصوصي لما تكون التضحية مع ناس بحبن، وكيف اذا كانوا ولاده من لحمه ودمه... هون اكيد التضحية ولو قد ما متعبة بتهون وبيتلاشى تعبها!!
بعد في شي... وهو المساواة بين الرجل والمرأة!
انا شخصيا ما بدي مساواة بكل شي... لان متل ما قلنا الرجل رجل والمرأة امرأة، من حيث طبيعة الجسد، العواطف، العقل، ...
متلا اذا طلعلي صرصور بالمطبخ... اكيد بنسى كل شي عن المساواة وبعيط لحدا شب يقتله... وعمرها ما كانت مساواة... بحياتي ما بفكر اقتله او حتى شيله وهو ميت!!
او اذا عم افتح مرطبان المربى، ما ح عيط لاختي تفتحه كرمال المساواة، لاء... بعيط لخيي هو اقوى منا جسديا بيفتحه بسهولة...
بس في اشيا مهم يكون في مساواة بين الطرفين...
انو شو المانع اذا المراة ساعدت زوجها بالشغل والمصروف، وهو بالسهرة ساعدها بضب البيت والطبخ والولاد... مش بالضرورة اذا رجل يعني عيب يجلي!!
وحتى بالمسؤوليات والقرارات المهمة كمان ما غلط يتشاوروا ويقرروا مع بعض ويتحملوا سوا مسؤولية قرارن... خاصة اذا كانوا من مستوى علمي وتفكير قريبين من بعضن.
ما ح طول... هيدا اللي اجا ببالي!!
وبالنهاية ما حدا في ينكر دور المرأة بالمجتمع خصوصي اذا كانت ام...
#يوم_المرأة_العالمي
No comments:
Post a Comment