ذكريات القراءة والقصص

متل العادة، ولادي من غير الشر نايمين بهالوقت... 

حبيت اكتب هالذكريات حتى لما ارجع لهون، اقرأها واتذكرها.

ما بعرف شو قصتي مع الكتابة... بالعادة ما كتير بحب اكتب، بس يمكن مع العمر بخاف الانسان ينسى تفاصيل حلوة بحياته ف بصير يحب يكتبها!

من انا وزغيرة بحب اقرا قصص ومام وداد كتير كانوا يشجعونا ويقرولنا وياخدونا ع معرض الكتاب. وكان عنا مكتبة كبيرة بقوضتنا... اكتريتها قصص...

بس مذكرة اول ما بلش ولعي بالقراءة كنا بالصيف وبغزة. وما كانوا ولاد عمتو فوق لالعب معن. لقيت لغز عند عمتو سعدية اسمه "الهارب الصغير"، كان يمكن عمري شي 9 ونص يعني طالعة عالخامس ابتدائي.

المهم قريته كله بهالنهار... عجبني كتير. وحبيت اسلوب الألغاز. ف صرت استعير من عند عمتو بسيمة ومن بيان ألغاز. كانت تجبلي ياهن معها عالمدرسة كل 5 ألغاز سوا... وبس خلصن رجعن واخد غيرن.

بعدين لما كنا نروح ع سوريا كانت مامي تجبلي ألغاز... ال10 ب100 ليرة سورية. كنت فكر انو ح يقضوني كل الصيف... خلصن ب10 ايام، كل يوم لغز.

كنت حب المغامرين الخمسة اكتر شي (نوسة ولوزة وتختخ وعاطف ومحب)  اكتر من فلفل واكتر من عامر وعارف وعالية... بعدين صرت اقرا ادهم صبري- رجل المستحيل...

قد ما كنت اقرا، ولما تكون ايام مدرسة، ما لحق اقرا بالنهار عبال ما خلص دروسي... كنت اقرا قبل ما نام. ف ركبلي داد ضو زغير حد تختي لاقرا عليه...

كنت اقرا كمان السلسلة الخضراء، كلها قصص حلوة. وكنت لما خلص القصص اللي عندي ارجع عيدن واقراهن. في قصص كنت حافظتها، متل الرفيق المجهول، او جبل العجائب...

وكانوا اخواتي محمد وعمر وحنان وريمة يحبوا احكيلن القصص اللي عم اقراها. ف كل يوم تقريبا قبل ما ننام لما نطفي الضواوي، يقولولي احكيلن قصة. ومع انو محمد وعمر كانوا بغير قوضة بس يسمعوني، وعمر يقلي:" زوزو علي صوتك لاسمع القصة." 

اوقات يغفوا بنص القصة، لاقي حالي عم احكي مع حالي... بعيطلن ما حدا برد، بطفي النويصة وبنام... واوقات انعس قبلن، صير احكي اشيا ما مفهومة... قلن خلص نعست او تمي عم يوجعني ما فيي كفي القصة!!!

اوقات تكون القصة زغيرة ما يشبعوا منها احكيلن قصة تانية... 

وكنا نقرا الاذكار وورد القران قبل القصة والنوم. كل واحد يقرا اية او دعاء ليخلصوا.

الله يكبر كمال وكريم لصير احكيلن قصص قبل ما يناموا ويفهموهن. كتير ناطرة يجوا يقولولي احكيلنا قصة، او احكيلنا قصتك انتي وزغيرة... وصير احكيلن قصصنا وكزدوراتنا ع سورية وغزة وبوارج والحشيشات بوج بيت تيتا، واحكيلن عن ستي حسن الله يرحمها... هيي كانت ملكة القصص. كانت دايما تحكيلنا قصص شمشون الجبار، وطرزان وشيتا، و... وكانت الخميس ليلة الجمعة تحكيلنا قصة نبي او صحابي، عشان ليلة الجمعة ما مستحب التفنيص بالقصص... 

ما بعرف ليش هلق خطر ع بالي الموضوع ع فكرة... بس انو بضلوا ذكريات برجعلن بعدين. وبركي كمال وكريم بيوم من الايام بيقروهن.