صعوبة التربية

بعرف انو التربية صعبة... 

اليوم كنا عن نتناقش انو اولادي كتير معلقين فيي

وكان عم يقلي زوجي انو غلط هيك وانو لازم مين ما اخدن ينيمن او يلعبن او يطعميهن لازم يقبلوا... انو متلا الولد بمين لازم يتعلق اذا بامه ما تعلق...

وهو بضل يقلي انو لازم ابعتن عند ستن تلعبن... بس انا ما بحب هالاسلوب، اني اترك ولادي وارتاح... ف انا ضليت مسؤولة عن اولادي واهتميت فيهن وما كنت حب حدا يتعاطى فيهن غيري.

بس هل انا عملت الشي الصح؟ 

يعني اذا انا صارلي شي ولادي ما بيسكتوا مع غيري. 

بس انا الهامي بقلي اني عملت الصح... يعني ما حدا بحب حدا تاني يربيله ولاده! 

الله يقدرني وربيهن بلا ما  يصيرلي شي ان شاء الله. 

أشيا مفيدة

ما بعرف كيف عم يمرق وقتي بالنهار والليل، بس عم حس اني ما عم اعمل شي مفيد بحياتي.

مع العلم انو ترباية كمال وكريم منها سهلة أبدا، بس بضل لاقي وقت أشتغل مع بهاء عاللابتوب من البيت، واقرا كتب. عن جديد رجعت اقرا. انا كتير بحب القراءة، وبفضل اقرا من الكتب أكيد، بس بوجود كمال وكريم ما بخاطر وحط كتاب قدامن، فصرت عم نزل كتب عن النت واقرا عن التلفون... أحسن من ولا شي. 

وهيك بيمرق نهاري، بضبضب البيت كل النهار من ورا كراكيب الاطفال، وبطبخ، وبمسح، وبغسل، وبطوي غسيل وبضبن، وبشتغل عاللابتوب، وبقرا انا وعم نيم الولاد. وعن جديد رجعت اشتغل كروشيه، وقررنا اني بيعن والربح بصمدن وبساعد فيهن ريمة بقسط الجامعة لأن قسطها كبير وما عم تلحق لحالها تدفعه.
وهيك، بضل مضغوطة كل النهار، بس العجيب انو مع كل هول الأشيا اللي بعملها بحياتي ما حاسة انو في شي مفيد عم اعمله حتى فيد المجتمع. يمكن لازم أنطر بعد سنتين ليكبروا كمال وكريم أكتر ويصير معي وقت أعمل أنشطة اجتماعية، او حتى فيي اشتغل كروشيه ووزع عالناس المحتاجة. هيك بكون تسليت وفدت بنفس الوقت.